O BNG organizou unha charla informativa en Vimianzo coa veciñanza afectada polo atraso na finalización do proceso administrativo da concentración parcelaria de Carnés e Cereixo, un procedemento que debe concluír coa entrega dos títulos notariais definitivos ás persoas propietarias dos terreos.
O encontro celebrouse no local comunitario de Cures e Mouzo e reuniu preto dun cento de asistentes. No acto participaron o deputado do BNG no Parlamento de Galicia, Óscar Insua, e o portavoz municipal da formación en Vimianzo, Benxamín Queiro.
Durante a reunión explicáronse as iniciativas parlamentarias promovidas para instar á Consellería do Medio Rural a acelerar a tramitación da concentración parcelaria. Antes da intervención de Insua proxectouse un vídeo sobre o traballo desenvolvido polo grupo parlamentario nacionalista neste asunto.
Entrega dos títulos definitivos da concentración de Carnés e Cereixo
A formación lembrou que o pasado mes de marzo, Oscar Ínsua preguntou no Parlamento polas previsións para aprobar a acta de reorganización da propiedade e proceder á entrega dos títulos notariais definitivos. Segundo indicou o BNG, a directora xeral de Desenvolvemento Rural sinalou daquela que a previsión é que o proceso remate no primeiro semestre de 2027.
Durante a súa intervención, Insua trasladou aos afectados que o BNG continuará traballando para que a Xunta «poña todos os medios posíbeis para finalizar o proceso canto antes» e asegurou que «existe un problema de falta de persoal para realizar os trámites que faltan».
Pola súa banda, Benxamín Queiro cualificou de «despropósito» o atraso acumulado na concentración parcelaria e afirmou que a formación seguirá apoiando á veciñanza para reclamar que a Xunta cumpra o novo prazo anunciado e complete a tramitación no primeiro semestre de 2027.
