O Concello de Camariñas mellorará a eficiencia enerxética do núcleo poboacional de Ponte do Porto cun renovado alumeado público, nunha actuación financiada polo Fondo de Compensación Ambiental da Xunta de Galicia cun investimento de 30.976 euros.
A intervención busca mellorar a iluminación pública e reducir o consumo enerxético e as emisións de gases de efecto invernadoiro, ademais de optimizar a seguridade viaria. Tamén se pretende limitar a contaminación lumínica e reducir a luz intrusa ou molesta no núcleo.
Para acadar estes obxectivos, dotarase a instalación dun sistema de telexestión que permitirá controlar de forma centralizada tanto o acendido como o apagado do alumeado.
As actuacións incluirán a substitución das luminarias existentes por outras de tecnoloxía LED, a adecuación da instalación e do cadro de mando de protección, así como a renovación das liñas de distribución que se atopen afectadas.
A obra está promovida polo Concello de Camariñas e conta co financiamento da Xunta de Galicia a través do Fondo de Compensación Ambiental.
