O portavoz do PSOE en Muxía, Iago Toba Campaña, presentou unha denuncia por unha presunta agresión física sufrida no interior do Santuario da Barca. Segundo relatou o propio Toba, os feitos foron cometidos por persoas que, na súa opinión, «levan anos violentándome a min e ao meu entorno político e persoal».O ex-alcalde afirma contar con «múltiples testigos e probas contundentes» para respaldar a súa versión, e sinala que as cámaras instaladas no santuario recolleron imaxes do sucedido.
Toba ofreceu a súa versión dos feitos tras a publicación dunha información de La Voz de Galicia, que relataba que o ex-rexedor fora abofeteado por, presuntamente, proferir insultos contra unha veciña. O mesmo xornal indicaba que a outra parte implicada estuda tamén presentar denuncia polo ocorrido.
Ante esta versión, o portavoz socialista denunciou o que considera unha estratexia para desprestixialo: «Primeiro agreden e agora publícano a periodistas (sen dar a cara) para tentar manchar o meu nome e a miña imaxe política e persoal. Non o consentirei». Toba engadiu que os feitos están denunciados «dende o minuto cero» e que o caso xa está xudicializado, e amosouse confiado en poder demostrar a súa versión dos feitos.
