O grupo municipal do Partido Popular no Concello de Camariñas alertou, a través da súa voceira, Paula Mouzo Mas, do que cualificou como «grave descontrol financeiro» nas arcas locais e criticou o «absoluto abandono» no que, segundo os populares, se atopan as parroquias do municipio.
Fixeron estas declaracións con motivo da aprobación da Conta Xeral correspondente ao exercicio 2025, no marco do pleno municipal celebrado onte. Os populares sinalaron que o resultado orzamentario reflicte un descenso de 850.000 euros respecto a 2024 e cualificaron de «triunfalista» a valoración feita polo Goberno Local sobre a situación económica municipal.
«O que de verdade asusta é o desaforro neto, que pasou de 958.000 euros en 2023 ao 1,7 millóns deste ano», declarou Mouzo, quen sinalou que este dato implica que o Goberno Local gasta máis do que ingresa.
30% das adxudicacións «a dedo»
O PP denunciou ademais que o 30% das adxudicacións dun orzamento de case 7 millóns de euros se realizan «a dedo», o que, segundo o grupo municipal, evidencia un proceder «sen transparencia» que ten xerado reparos continuados por parte da intervención municipal.
Na mesma sesión, os populares votaron a favor da solicitude para que as Festas do Carme de Camariñas sexan declaradas Festa de Interese Turístico de Galicia, e reclamaron ao Goberno Local un maior nivel de implicación de cara a esta celebración.
«Non podemos permitir que durante as festas as rúas se convertan en orinais públicos. É necesario que o Goberno Local poña en marcha un servizo de limpeza, a colocación de baños e unha maior presenza de policía durante eses días», reclamou Mouzo.
Varias peticións do PP
No pleno, a portavoz popular trasladou deficiencias na capital municipal de Camariñas, falta de seguridade viaria no Riás e Fonte Barreira, abandono da estrada de Santa Mariña a Arou e Lobeiras e do lavadoiro de Tasaraño(Xaviña) e outras peticións en Arou, Camelle e en Ponte do Porto. Os populares tamén demandan a creación dun Punto Limpo Municipal.
