O BNG anunciou hoxe a presentación dunha demanda xudicial contra o portavoz municipal do PSOE de Muxía, iA Toba, polos seus reiterados ataques verbais e descualificacións contra a portavoz municipal do BNG no concello, Mercé Barrientos.
A secretaria da Área de Organización do BNG, Lucía López, denunciou que o comportamento do edil socialista «superou todos os límites» e advertiu de que a formación «non o vai consentir». Reclamou á dirección do PSOE que asuma responsabilidades ante a gravidade dos feitos e sinalou que os ataques teñen «unha clara dimensión machista», ao buscar «desacreditar, intimidar e expulsar as mulleres do espazo público mediante o insulto e a humillación».
López engadiu que non se trata dun feito illado, senón dun «comportamento reiterado» que considera «incompatible coa responsabilidade que debe asumir calquera representante público».
Reproches ao PSdeG-PSOE
Pola súa banda, Mercé Barrientos cualificou as expresións recibidas como «absolutamente inaceptables» e incompatibles co exercicio dun cargo público. «Non estamos aquí para recibir as agresións que veño soportando desde que son portavoz do BNG de Muxía», afirmou. A concelleira lamentou que as actas municipais non reflictan «as risas, os acenos agresivos, o ton de voz nin a reiteración constante dos insultos».
Barrientos mostrou a súa preocupación por que este tipo de condutas procedan «dun partido que se di progresista e feminista» e afirmou: «Non nos van expulsar da política. Imos seguir aquí e imos seguir apoiándonos».
O BNG mostrou o seu respaldo total á concelleira nacionalista.
