A Deputación da Coruña deu luz verde, de forma unánime, a un novo proxecto para renovar o pavimento da estrada provincial DP-9203, vía que une os núcleos de Caxadas e Baíñas, dentro do concello de Vimianzo. A actuación, cun custo de 442.900,52 euros, abranguerá dous tramos que suman máis de tres quilómetros e medio.
Os traballos pasarán por colocar unha nova capa asfáltica de cinco centímetros sobre toda a anchura da vía, ademais de reparar os puntos onde o firme presenta maior desgaste. Antes de asfaltar, os equipos retirarán a maleza, limpiarán os laterais da estrada e adecuarán as cunetas para mellorar a saída da auga da choiva. A actuación tamén contempla pintar de novo as marcas viarias e actualizar a sinalización e os elementos de protección. O prazo previsto para rematar as obras é de cinco meses desde que se formalice o inicio dos traballos.
Mellora necesaria nunha comunicación estratéxica
A responsable provincial de Vías e Obras e alcaldesa de Vimianzo, Mónica Rodríguez, afirmou que «se trata dunha mellora moi necesaria nun dos principais viarios provinciais do municipio e nunha conexión estratéxica para as comunicacións de Vimianzo cara a Santiago».
Esta actuación chega despois doutra intervención anterior na mesma vía, valorada en máis de 1,5 millóns de euros, que serviu para eliminar un tramo considerado perigoso ao seu paso por Padreiro grazas a unha nova variante, unha ruta peonil de case dous quilómetros e unha ponte sobre o río Castro. Coa nova achega, o gasto acumulado nesta estrada nos últimos dous exercicios roza os dous millóns de euros.
