A Xunta de Galicia concedeu unha nova Casa do Maior ao municipio, que se situará na antiga escola de Nemiña. A xestión correrá a cargo da entidade Colaxe, mentres que o Concello pon o local á súa disposición.
Un total de 25 prazas no municipio de Muxía
O novo servizo suma 10 prazas de atención a persoas maiores. Con elas, Muxía chegará a un total de 25 prazas de Casa do Maior.
Desde o Partido Popular de Muxía valoraron positivamente este noticia e agradeceron expresamente á Xunta e á conselleira de Política Social, Fabiola García, a súa implicación co concello e o seu compromiso co desenvolvemento de recursos de atención ás persoas maiores no rural. Os populares puxeron en valor a colaboración entre administracións nun municipio con importante dispersión territorial e elevada necesidade de servizos de proximidade.
Nos últimos dous anos, Muxía conseguiu dúas Casas do Maior que suman 15 novas prazas. O PP atribúe parte deste resultado á área de Política Social, de responsabilidade popular no goberno municipal, que facilitou a colaboración coa Xunta e coas entidades xestoras e achegou os espazos municipais necesarios. Neste sentido, recoñeceu o labor da concelleira da área, Sofía López.
«A Xunta cumpre con Muxía»
A Casa do Maior de Nemiña dá continuidade ao servizo posto en marcha en Senande, inaugurado o ano pasado. Para o PP, estes recursos favorecen a autonomía das persoas maiores, axudan á conciliación das familias e permiten que permanezan no seu contorno habitual. O partido reafirmou o seu compromiso de seguir atraendo recursos e reforzando os servizos sociais.
“Unha vez máis, a Xunta de Galicia cumpre con Muxía. Pero tamén hai un traballo municipal detrás destes resultados: xestionar, colaborar e poñer os medios necesarios para que os proxectos se fagan realidade. En só dous anos conseguimos 15 novas prazas de Casa do Maior para o noso concello”, sinalaron.
Foto- Inauguración Casa do Maior de Senande
