O BNG de Muxía instou ao goberno local a acometer de maneira urxente a reparación de diversas infraestruturas e equipamentos municipais que, segundo denuncia a formación nacionalista, presentan un avanzado estado de deterioro en distintos puntos do concello.
Os nacionalistas sinalan que levan advertindo desta situación desde o inicio do actual mandato e reclaman ao executivo municipal que actúe para solucionar problemas que afectan a estradas, espazos públicos e servizos de uso habitual. Entre as deficiencias citadas figuran vías con fochancas, cunetas cubertas de broza, accesos ás praias en mal estado, fontes e lavadoiros sen arranxar, parques infantís deteriorados, mobiliario urbano danado e sinalización practicamente ilexible.
A portavoz municipal do BNG, Mercé Barrientos, trasladou estas preocupacións ao alcalde durante unha reunión recente. Segundo explicou a formación, o rexedor indicou que non poderá dispoñer dos fondos previstos no orzamento municipal de 2026 ata o vindeiro 19 de xuño, circunstancia que atribuíu ao atraso na execución de diversas actuacións e investimentos.
Barrientes pídelle ao goberno bipartito muxián “que se poña a traballar en serio, porque Muxía non pode esperar máis”.
Barrientos reclamou que, unha vez estean dispoñibles eses recursos, se destinen ás obras necesarias para mellorar as infraestruturas municipais. Con todo, considerou que existen actuacións de mantemento básico que poderían terse realizado sen necesidade de grandes investimentos. Neste sentido, afirmou que “xestións mínimas que non requiren de grandes inversións seguen sen ser acometidas mentres a deterioración e o abandono das parroquias continúan”.
Entre os exemplos expostos pola portavoz figura a marquesiña de Lourido, que continúa con cristais rotos desde hai anos. Segundo indicou, esta situación impediu que escolares e outros usuarios puidesen resgardarse da chuvia durante o inverno.
O BNG tamén denunciou a existencia de bancos sen ancoraxes ou retirados e non repostos, parques infantís con elementos enferruxados e indicadores deteriorados ou ilexibles. Barrientos asegurou que algúns destes elementos levan anos sen ser substituídos e apuntou que aínda permanecen paneis informativos de antigas obras nos que os importes aparecen expresados en pesetas.
