O Concello de Vimianzo solicitou á Xunta de Galicia a primeira concesión administrativa para ocupar unha parte do dominio público marítimo-terrestre (DPMT) co obxectivo de poñer en valor o muíño de mareas de Cereixo e destinalo a un novo uso como museo etnográfico.
Segundo recolle o acordo publicado hoxe no Diario Oficial de Galicia (DOG), o Servizo do Litoral da Coruña, dependente da Consellería de Medio Ambiente e Cambio Climático, deu inicio ao procedemento de información pública da solicitude presentada polo Goberno municipal. A documentación está dispoñible no portal de transparencia da Xunta e abrirase un prazo de 20 días hábiles para que persoas interesadas poidan presentar alegacións ou achegas.
A petición do Concello de Vimianzo contempla a ocupación dunha superficie de 201,55 metros cadrados de dominio público marítimo-terrestre, na zona onde se sitúa o antigo muíño de Cereixo. O proxecto busca recuperar este elemento patrimonial mediante a súa rehabilitación e a súa transformación funcional en espazo museístico de carácter etnográfico.
Cómpre lembrar que esta actuación enmárcase no Catálogo de bens de valor cultural no litoral de Galicia.No conxunto de Galicia, este catálogo inclúe 2.003 bens, dos cales 1.041 pertencen ás categorías arquitectónica e industrial.
O muíño de mareas de Cereixo
O muíño de mareas de Cereixo, incluído neste catálogo no municipio de Vimianzo, é unha construción do século XVII de tipoloxía hidráulica produtiva, empregada historicamente para a moenda de cereais aproveitando a enerxía das mareas. Trátase dun exemplo representativo da actividade agroindustrial vinculada ao litoral galego.
O edificio conta con dúas plantas e cuberta a dúas augas. Aínda que o seu estado de conservación actual é deficiente, mantén elementos orixinais de especial interese, como as moas de moenda e as canles de entrada da auga, o que reforza o seu valor patrimonial e a súa idoneidade para unha intervención de recuperación orientada á divulgación cultural.
