O BNG no Concello de Muxía rexistrou unha moción para o seu debate no vindeiro pleno da corporación local na que solicita que se inicie a equiparación das condicións salariais e laborais das traballadoras da empresa concesionaria do Servizo de Axuda no Fogar (SAF) coas do persoal laboral do propio Concello que desenvolve as mesmas tarefas de asistencia.
A proposta, presentada pola portavoz nacionalista Mercé Barrientos, insta ao goberno local a estudar as medidas económicas, administrativas e contractuais necesarias para acadar a igualdade retributiva dentro do marco legal vixente. A iniciativa establece que este proceso debe manter en todo momento as condicións máis favorables que xa posúa o persoal da concesionaria.
Principio básico de xustiza laboral
«Non se trata unicamente de reclamar unha mellora económica, senón de defender un principio básico de xustiza laboral: a persoas que realizan un traballo de igual natureza e valor, coa mesma categoría profesional e dentro do mesmo servizo público, deben recoñecérselles unhas condicións laborais e retributivas equivalentes», declarou Mercé Barrientos. A portavoz engadiu que o rescate da concesión pode ser unha solución estrutural, pero a equiparación das condicións é unha necesidade inmediata.
Posible rescate e xestión directa do SAF
Xunto á mellora retributiva, o BNG solicita ao executivo municipal información sobre o estado do estudo económico e técnico sobre o posible rescate e a xestión directa do servizo. No caso de non ter rematado devandito informe, a moción pide a súa elaboración urxente, incluíndo a análise dos custos actuais, a viabilidade económica e administrativa, a estimación dos recursos humanos precisos e o impacto sobre o persoal.
Así mesmo, a iniciativa propón convocar unha xuntanza entre o equipo de goberno, a representación das traballadoras e a empresa para abordar as diferenzas existentes. A moción inclúe tamén a esixencia de incorporar cláusulas sociais nos vindeiros pregos de contratación e fixa un prazo de seis meses para dar conta ao pleno dos avances acadados.
