O Concello de Vimianzo achegará 15.000 euros para axudar a financiar as Festas Patronais de 2026, que se celebrarán entre o venres 7 e o luns 10 de agosto. A alcaldesa, Mónica Rodríguez, e Marta Castro, en representación da Asociación de Festas de Vimianzo, asinaron o convenio de colaboración que recolle esta achega municipal. Segundo indicou o Concello, esta colaboración reafirma o compromiso da institución cunha das citas máis importantes do calendario festivo local, tanto polo seu valor social e cultural coma polo impacto que xera na dinamización económica do municipio, especialmente no comercio, a hostalaría e o turismo.
Despistaos, El Combo Dominicano ou La Fórmula
A programación inclúe actuacións musicais ao longo de catro xornadas. O venres 7 de agosto subirán ao escenario Pol 3.14, Despistaos e a orquestra Cinema.
O sábado 8 será a quenda de El Combo Dominicano e La Fórmula, xornada que tamén incluirá a misa en honra da Virxe do Carme, pasarrúas e sesión vermú. O domingo 9 pecharán as actuacións Ráfaga, a orquestra Principal e DJ Josino Destroyer, ademais dos actos relixiosos dedicados a San Roque. A cita remata o luns 10 de agosto co tradicional Día do Nen@, xornada dirixida ao público infantil e familiar que contará con inchables, festa da escuma e animación musical.
«Amosar Vimianzo a quen nos visita»
A alcaldesa destacou que «as festas patronais son un espazo de encontro para a veciñanza e tamén unha oportunidade para amosar Vimianzo a quen nos visita», e engadiu que dende o Concello se segue a apoiar o labor da comisión organizadora para ofrecer unha programación pensada para todos os públicos.
Pola súa banda, Marta Castro agradeceu o apoio municipal e puxo en valor o esforzo da Asociación de Festas para sacar adiante unha programación variada, posible grazas á implicación de colaboradores, empresas patrocinadoras e veciñanza.
