O grupo municipal socialista de Muxía denunciou este luns a situación do stand do Concello na Feira Internacional Semana Verde de Silleda, ao asegurar que permaneceu sen montar e baleiro de contido durante as dúas primeiras xornadas do certame, incluída a inauguración.
Segundo indica o PSdeG nun comunicado, esta circunstancia xerou malestar entre a organización e entre os visitantes que percorreron a feira, ao atoparse cun espazo reservado ao municipio sen material expositivo nin elementos de promoción turística.
Os socialistas sosteñen que, tras recibir advertencias por parte da organización, o espazo foi acondicionado posteriormente con varias láminas fotográficas e dúas nasas, unha actuación que consideran insuficiente para representar a oferta cultural, turística e patrimonial de Muxía.
A formación aproveitou para cuestionar a política de promoción turística do actual goberno local, encabezado por Javier Sar, e asegurou que a presenza do municipio en diferentes eventos sectoriais perdeu relevancia nos últimos anos.
O portavoz socialista, Iago Toba, afirmou que a situación vivida en Silleda supón un prexuízo para a imaxe do concello. “Ver como este goberno trata a imaxe de Muxía é absolutamente lamentable”, sinalou, ao tempo que defendeu a necesidade de reforzar a presenza promocional do municipio nos principais escaparates turísticos de Galicia.
O PSdeG reclamou explicacións ao executivo local polos feitos denunciados e tamén pola ausencia, segundo asegura, de representantes do goberno municipal durante os catro días de celebración da feira.
FOTO- PORTADA-Iago Toba en Radio Xallas – Arquivo
