O Castelo de Vimianzo deu este xoves inicio ao denominado Período Irmandiño co acto simbólico da baixada do pendón dos Moscoso, un dos momentos máis representativos do calendario cultural do municipio. Desde hoxe, a Torre da Homenaxe luce a icónica cabeza de lobo da liñaxe dos Moscoso, sinal da conta atrás para unha nova edición do Asalto ao Castelo, que se celebrará os días 3 e 4 de xullo.
No acto participaron a alcaldesa de Vimianzo, Mónica Rodríguez, o deputado de Patrimonio da Deputación da Coruña, Xosé Lois Penas, así como representantes das asociacións Cherinkas e Axvalso, entidades implicadas na organización da recreación histórica. A colocación do pendón marca oficialmente o inicio do período simbólico que culminará coa representación do ataque irmandiño á fortaleza.
Mostra de Artesanía en Vivo
A xornada serviu tamén para inaugurar unha nova edición da Mostra de Artesanía en Vivo, que poderá visitarse no castelo ata o 15 de setembro en horario de mañá e tarde. A mostra converte o recinto nun espazo dedicado aos oficios tradicionais, á creación artesanal e aos produtos locais.
A programación inaugural completouse coa apertura da exposición temporal “O liño ten futuro?”, promovida pola Asociación Amigos do Liño, e cun desfile de pezas elaboradas con esta fibra natural, que puxo en valor a súa vixencia e potencial creativo.
Ademais, ao longo do verán desenvolveranse obradoiros artesanais todos os sábados, co obxectivo de achegar os oficios tradicionais á cidadanía e favorecer a súa transmisión entre xeracións.
