O Concello de Camariñas fixo un chamamento á participación na ‘Andaina por Ataxia de Friedreich’, unha marcha benéfica que se celebrará o domingo 27 de setembro co obxectivo de recadar fondos para axudar a custear as terapias do veciño Juan Pérez González.
A iniciativa, organizada pola asociación Con Ataxia Pero Sin Límites coa colaboración do Concello de Camariñas, desenvolverase baixo o lema «Camiñamos xuntos, chegamos máis lonxe». A saída está fixada ás 12.00 horas no paseo da Ponte do Porto e o percorrido discorrerá por todo o paseo ata a meta, situada no Carballo de Cereixo. Segundo a organización, trátase dunha ruta accesible e apta para todas as idades, pensada para participar en familia.
Para recadar os fondos destinados ás terapias, a organización puxo á venda camisetas solidarias cun prezo de sete euros. As persoas interesadas en inscribirse na andaina ou en adquirir a camiseta poden facelo no teléfono 697 828 580.
Desde o Concello animouse a veciñanza do municipio e de toda a Costa da Morte a sumarse á xornada, en apoio a unha causa que xa mobilizou a comarca en edicións anteriores.
A ataxia de Friedreich é unha enfermidade neurodexenerativa de orixe xenética e carácter raro que afecta á coordinación dos movementos e que require tratamento continuado, entre el, a fisioterapia e outras terapias de rehabilitación.
