O Concello de Camariñas desmentiu as informacións difundidas, nunha nota de prensa do BNG local, sobre a presenza de amianto nas zonas de recreo do CEIP O Areal, tras a intranquilidade xerada entre parte das familias do alumnado.
A alcaldesa, Sandra Insua, contactou coa dirección de obra, dependente da Xunta de Galicia, para avaliar a situación no centro escolar, onde se están a executar traballos de retirada de cuberta de fibrocemento.
Informacións desde o concello de Camariñas
Segundo o Concello, o alumnado non accede en ningún momento á zona traseira do recinto, que é onde se está a centralizar este material, polo que as áreas de recreo empregadas polos nenos e nenas permanecen delimitadas e seguras.
O material xa retirado atópase, segundo o mesmo comunicado, encapsulado en sacos especiais homologados, en cumprimento da normativa de seguridade vixente, sen que iso supoña risco para a comunidade educativa.
Un protocolo de actuación establecido no CEIP O Areal
O centro e a dirección de obra contan cun protocolo de actuación definido para esta fase dos traballos. Ademais, estableceuse que as tarefas de retirada dos tellados restantes se realicen exclusivamente os venres pola tarde e os sábados, fóra do horario lectivo, para evitar calquera contacto co alumnado.
Dende o Concello sinalan que a seguridade dos menores é a prioridade principal, que a situación está controlada e supervisada por profesionais, e piden tranquilidade ás familias ante a difusión de informacións que cualifican de inxustificadas.
