O pleno municipal de Muxía aprobou o POS 2026 nunha sesión na que o debate estivo condicionado pola emenda presentada polo PSOE, finalmente rexeitada polos grupos de goberno e polo BNG. A continuación, o documento definitivo saíu adiante coa unanimidade da corporación.
O alcalde, Javier Sar (Independentes), explicou que o plan ascende a 772.000 euros e que a maior parte, 532.000, irá destinada a gasto corrente. Os 240.000 euros restantes reservaranse para unha actuación concreta: a mellora da estrada Agranzón-Senande. O rexedor vinculou este reparto á situación económica do Concello, asegurando que existe un “desfase” acumulado próximo ao millón de euros e que se está a cumprir co Plan Económico Financeiro seguindo criterios técnicos.
Emenda do PSOE
A emenda do PSOE, defendida por Iago Toba, propoñía empregar 179.000 euros en melloras viarias en Leis, Senande e Ozón. O portavoz socialista criticou o criterio do executivo e cualificouno de “incoherencia”. Durante o intercambio, Sar insistiu en que non se poden aprobar obras sen proxectos pechados, mentres Toba reaccionou presentando un proxecto na mesma sesión.
No debate tamén interveu Sandra Vilela (PP), que afirmou: “recibimos un concello inmerso nun Plan Financeiro pola súa xestión, que deixou a Muxía intervida”. Pola súa parte, Mercé Barrientos (BNG) asegurou que o seu grupo mantén unha postura «responsable».
