A ilustradora infantil de Camelle Miryam Mouzo presenta unha nova proposta literaria dirixida ao público infantil coa publicación de «Avogato», o primeiro libro protagonizado por este novo personaxe. Tal e como xa avanzara a autora nas últimas semanas, a obra chega tras os seus anteriores traballos ilustrados para lectores de Educación Primaria.
O libro publícase tanto en galego como en castelán e mantén a estética kawaii característica das creacións de Mouzo, desenvolvéndose novamente nun contexto escolar. Nesta ocasión, a autora combina elementos propios do cómic coa narrativa ilustrada para relatar unha historia protagonizada por tres amigos moi diferentes que se ven envoltos nun misterio por resolver, coa participación dun peculiar gato apaixonado polo mundo da avogacía.
Segundo explica a propia creadora, «Avogato é un gatiño soñador e tenaz que ten un gran soño: converterse en avogado cando sexa maior». No seu primeiro día nun novo colexio coñece a Timituga, un sapoconcho reservado e pouco falador, e a Liardilla, unha esquío activa e algo despistada.
A trama arranca cando un estudante acusa outro de terlle roubado un lapis. Ante a situación, Avogato decide investigar o sucedido e seguir as distintas pistas para aclarar os feitos. A historia aborda cuestións como a amizade, a empatía e a necesidade de escoitar todas as versións antes de emitir xuízos precipitados.
