O Concello de Vimianzo inaugurou o novo sendeiro de acceso ao Muíño de Mareas de Cereixo, unha obra financiada con máis de 157.000 euros da Consellería do Mar a través do GALP Costa da Morte. O acto contou coa presenza da alcaldesa Mónica Rodríguez, do xerente do GALP, Guillermo González, e da delegada territorial da Xunta na Coruña, Belén do Campo, quen salientou que a intervención reforza un enclave de alto interese natural, cultural e etnográfico.
A actuación inclúe a pavimentación íntegra do camiño, nova iluminación, mobiliario e unha zona de observación con vistas á ría e á illa do Forno do Sapo. Durante a xornada realizouse un percorrido interpretado pola contorna e proxectouse un documental sobre o papel histórico das mulleres de Cereixo no ámbito mariñeiro.
O sendeiro forma parte do proxecto “Mareas”, que incorpora accións ambientais, educativas e de dinamización social. Co novo acceso, o Concello completa un itinerario sostible e accesible que conecta coa senda existente e reforza o atractivo turístico e patrimonial da parroquia.
