O Concello de Camariñas celebrará o vindeiro mércores, 29 de xullo, un pleno extraordinario no que nomeará á cantante Luz Casal como Filla Adoptiva do municipio.
A corporación municipal outorgará esta distinción á artista pola difusión internacional da cantiga tradicional “Camariñas”, unha peza coa que levou o nome do municipio a escenarios e públicos de todo o mundo.
Luz Casal asistirá presencialmente ao acto, que estará aberto ao público, e mostrou o seu agradecemento polo recoñecemento, que cualificou como “un honor grandísimo”.
Desde o Concello destacan que a interpretación da cantante contribuíu a dar unha nova dimensión internacional a esta peza do folclore galego, xa popularizada anteriormente por Luar na Lubre.
O nomeamento busca recoñecer a contribución da artista á proxección da vila a través dunha das súas cantigas máis representativas.
