Camariñas acollerá o vindeiro domingo 8 de febreiro a proba ‘3 H Resistencia Concello de Camariñas’ de BTT, que será a última cita da Copa Galicia de Resistencia 2026, organizada pola Federación Galega de Ciclismo.
Baikers do Vilán
A carreira está organizada pola Peña Ciclista Baikers do Vilán, en colaboración co Concello de Camariñas, e terá saída e chegada na praia do Ariño. A proba foi presentada na casa do concello coa presenza da alcaldesa, Sandra Insua, do concelleiro de Deportes, Fabián Canosa, e de representantes do club organizador.
A cita de Camariñas pechará un circuíto composto por seis probas, que se celebrarán ao longo do mes de xaneiro e comezos de febreiro en Lousame, Noia, Meis, Muros, Narón e, finalmente, Camariñas.
As inscricións deberán formalizarse a través da páxina web da Federación Galega de Ciclismo. A competición inclúe categorías desde cadete ata Máster 60, ademais de parellas femininas, masculinas e mixtas.
