O Concello de Vimianzo anunciou que o Auditorio ofrecerá 14 espectáculos culturais de xaneiro a maio na primeira programación de 2026, financiada pola Rede Galega de Teatros e Auditorios da Xunta de Galicia, o Centro Dramático Galego e a Rede Cultural da Deputación da Coruña. Segundo destacan desde o Concello, trátase dunha “programación cultural diversa, de primeira orde e accesible para todos os públicos”.
Abrirá o exercicio Antonio Barros e iAlma co recital “Unha viaxe polas grandes voces da canción española” o 18 de xaneiro, e a venda de entradas será na Casa da Cultura de luns a venres de 9:30 a 14:30 horas e unha hora antes de cada espectáculo.
O resto da programación, segundo a nota de prensa, será:
- 24 de xaneiro: a comedia cómica “Entre dos” protagonizada por Teté Delgado e Julio Pereira.
- 30 de xaneiro: o Centro Dramático Galego achega a Vimianzo a estrea “Memorias dun neno labrego”.
- 7 de febreiro: concerto da vimiancesa Gala Cernadas e Ernesto Alemán de violín e piano “Ecos do tempo”.
- 20 de febreiro: estrea de Nortear da compañía Columna Balteira, residencia artística no Auditorio de Vimianzo. Nortear é unha peza escénica onde o espectral se confunde co real, o poliítico co onírico, o etnográfico co poético.
- 7 de marzo: Teatro do Noroeste achega a Vimianzo a súa última produción “Manual de patronaxe”.
- 14 de marzo: Contraproducións “Yo no quiero irme a Francia” coa recoñecida actriz María Galiana.
- 21 de marzo: Mago Teto.
- 28 de marzo: 8º Festival folclórico Foliada do Río Grande, organizado polos grupos Airiños do Río Grande e a Foliada de Salto en colaboración co Concello.
- 11 de abril: a compañía Trifásico Teatro achega o espectáculo “Vento metal”, con Jéssica Canosa no elenco.
- 18 de abril: Os Naufragos Teatro presenta Riazor Ostia, un poema escénico sobre o odio, a intolerancia e a resistencia, lembrando o asasinato de Pier Paolo Pasolini.
- 25 de abril: a compañía Malasombra con “O asombro”, peza de Cándido Pazó sobre personaxes populares do Ourense de finais do XIX.
- 2 de maio: Transeúnte, espectáculo coproducido polo Centro Coreográfico Galego, que combina música, canto, danza tradicional e danza contemporánea.
