A voceira municipal do Partido Popular en Camariñas e deputada autonómica, Paula Mouzo Mas, volveu a denunciar o que cualificou como un “desmantelamento” dos Corpos e Forzas de Seguridade do Estado por parte do Goberno central, unha situación que, segundo afirmou, está a ter consecuencias directas na seguridade da Costa da Morte.
Mouzo insistiu na necesidade de incrementar o número de efectivos da Policía Local e da Garda Civil para facer fronte á sensación de inseguridade que, segundo indicou, se estende entre a veciñanza da comarca e, de maneira especial, no municipio de Camariñas.
A portavoz popular lembrou que non é a primeira vez que a súa formación reclama este reforzo. Hai máis dun ano, o PP levou ao pleno municipal unha moción para frear o que consideran un desmantelamento da Garda Civil no rural, unha iniciativa que foi rexeitada cos votos do goberno local e do BNG.
Nesta ocasión, Paula Mouzo puxo sobre a mesa varios incidentes ocorridos nas últimas semanas, entre eles a agresión a un mozo e a queima dun vehículo en lumes provocados. “Por moito que algúns miren para outro lado, é unha realidade que A Costa da Morte, en xeral, e Camariñas, en concreto, carecen dos servizos mínimos necesarios para garantir a seguridade”, denunciou.
Segundo explicou, a falta de efectivos provoca que durante amplos momentos do día e, especialmente pola noite, zonas rurais queden desprotexidas fronte a delincuentes que coñecen con exactitude a localización dos poucos efectivos dispoñibles. Ante esta situación, Mouzo avanzou que seguirá reclamando máis medios ao considerar que se trata dun asunto prioritario.
FOTO ARQUIVO- Paula Mouzo e Paula Prado durante unha visita a Camariñas
