Camariñas acollerá os días 30 e 31 de outubro as Xornadas da Memoria Democrática, o acto central de “Sementando Memoria”, proxecto co que o Concello pretende dignificar as persoas represaliadas desde o inicio da Guerra Civil e durante a ditadura.
A República e a Guerra Civil en Camariñas
O venres 30 comezará ás 12:00 horas cunha ofrenda floral no Memorial da Ponte do Porto. O investigador porteño Rafael Lema guiará unha Ruta da Memoria co alumnado do IES Pedra da Aguia.
Pola tarde, ás 19:00, o Centro Cultural da Ponte do Porto acollerá a presentación do libro “A República e a Guerra Civil en Camariñas”, a cargo do propio Lema, e a xornada rematará co documental “Ezkaba: La gran fuga de las cárceles franquistas”.
Represión franquista na Costa da Morte
O sábado 31, a primeira cita será ás 10:00 horas, con outra ofrenda floral e a inauguración da Avenida das palilleiras. Ás 11:00, o Faro Vilán servirá de escenario para a conferencia do historiador Luís Lamela García sobre a represión franquista na Costa da Morte, seguida da proxección de “La red Ponzán”. Os actos de homenaxe incluirán a lectura dos nomes dos represaliados.
As xornadas forman parte dun proxecto máis amplo. En Ponte do Porto instalarase un panel con contexto histórico, a lista de represaliados e o mapa do roteiro, e crearase o Sendeiro da Memoria, unha ruta dixital con realidade aumentada a través da plataforma ONIRIX.
