A Xunta de Galicia concedeu un Obradoiro dual de Emprego para os concellos de Vimianzo, Camariñas e Muxía,
O proxecto, denominado “2026 CAMUVI FORESTAL”, contará con 20 alumnos e alumnas traballadoras e terá unha duración de nove meses. A formación estrutúrase en tres especialidades: limpeza en espazos abertos e instalacións industriais, actividades auxiliares en conservación e mellora de montes e montaxe de mobles e elementos de carpintaría. O investimento global ascende a 501.552 euros.
O obradoiro será xestionado polo Concello de Vimianzo e está financiado a través dunha liña de subvencións públicas que combina formación teórica e práctica, permitindo que as persoas participantes adquiran experiencia profesional real mentres desenvolven actuacións de interese xeral para a veciñanza.
Xuntanza dos concellos beneficiarios
Na xornada de presentación participaron a alcaldesa de Vimianzo, Mónica Rodríguez; o tenente de alcaldesa de Camariñas, Sergio Caamaño; e o alcalde de Muxía, Javier Sar, xunto con concelleiras, concelleiros e persoal técnico dos tres concellos. O encontro serviu para avanzar na planificación e nos primeiros pasos administrativos do proxecto.
Durante a reunión abordouse o inicio da programación do obradoiro, que permitirá formar un grupo de persoas nun ámbito con alta demanda laboral ao tempo que se executan traballos destinados á mellora de espazos e servizos municipais nos tres concellos participantes.
Nos vindeiros días, o Concello de Vimianzo iniciará os trámites para a posta en marcha da iniciativa, incluíndo o proceso de selección do alumnado-traballador e do equipo técnico, coa previsión de que o obradoiro comece nas próximas semanas.
