O Concello vén de rematar as obras de pavimentación no viario de Oróns, na parroquia de Bamiro. A actuación, financiada pola Axencia Galega de Desenvolvemento Rural, mellorou un total de 375 metros, repartidos en tres treitos distintos.
En dous deles, realizouse a limpeza de gabias nas dúas marxes e aplicouse unha nova capa de aglomerado en quente. No terceiro, optouse por un tratamento asfáltico superficial e rego de selado en toda a plataforma.
O concelleiro de Obras, Miguel Ángel Pérez, subliñou que este tipo de intervencións forman parte dunha liña clara de traballo:
“Seguimos mellorando pouco a pouco o noso rural. É esencial para facilitar os desprazamentos, mellorar a accesibilidade e garantir a seguridade viaria e peonil da nosa veciñanza”.