O Concello de Vimianzo presentou en FITUR, a Feira Internacional de Turismo que se celebra en IFEMA, a súa nova campaña de promoción turística baixo o lema “Vimianzo. Comeza a túa conquista”. O proxecto audiovisual ten como obxectivo posicionar o municipio como punto estratéxico e enclave privilexiado desde o que descubrir a Costa da Morte.
A campaña baséase nun vídeo duns noventa segundos de duración, cun ton próximo e enérxico, que presenta Vimianzo como “campamento base” e corazón da comarca, desde onde acceder con facilidade a destinos como Fisterra, Camariñas, Laxe ou Malpica. A proposta aposta por un modelo de turismo tranquilo, sen présas nin masificacións, centrado na autenticidade do territorio.
A través dunha narración inspiradora, a peza convida a “conquistar” a experiencia da Costa da Morte desde a calma, poñendo en valor a paisaxe, a cultura e a gastronomía local. O Concello busca reforzar así a imaxe de Vimianzo como un lugar acolledor, ben conectado e ideal para establecerse varios días e descubrir a comarca.
Durante a presentación, a alcaldesa de Vimianzo, Mónica Rodríguez, destacou que “Vimianzo é un lugar para chegar, quedar e desde o cal comezar a descubrir todo o que pode ofrecernos a Costa da Morte”, subliñando a vontade de consolidar o municipio como corazón loxístico e emocional do territorio.
