O BNG e o PSdeG criticaron hoxe en Vimianzo o proxecto do Goberno da Xunta para a prolongación da AG-55. O presidente Alfonso Rueda e a conselleira de Infraestruturas participaron nun acto para anunciar a licitación da chamada primeira fase, entre Santa Irena e a estrada AC-432.
Valoración BNG
Oscar Insua, deputado do BNG, denunciou que “hai que ter pouca vergoña e moita cara para anunciar a bombo e platillo o que é un incumprimento en toda regra, no fondo, na forma e no tempo”.
O deputado criticou que a obra non será unha autovía completa, senón un corredor con só un carril por sentido, e que os cartos empregados no acto de propaganda poderían dedicarse a centros de día ou vivenda pública na comarca. Insua pediu á Xunta “menos propaganda e máis investimentos” e destacou a necesidade de mellorar o transporte público e eliminar a peaxe entre Carballo e A Coruña.
Segundo Insua, “despois de anos de espera e incumprimentos, un político sensato non viría a alardear e presumir dun engano, pero o PP está curado de espanto”.
Valoración PSdeG
Patricia Iglesias, deputada do PSdeG, censurou que o proxecto só contempla un treito de 5,5 quilómetros e que “non vai ser autovía, vai ser un corredor”, con só unha calzada para ambos sentidos. Iglesias lembrou que a ampliación da AG-55 foi un proxecto iniciado durante o Goberno de Touriño, con previsión de prolongalo ata Berdoias, e que o executivo de Feijoo paralizou desde 2009.
A deputada socialista afirmou que o PSdeG seguirá reivindicando a finalización da infraestrutura tal como estaba previsto no proxecto orixinal. Ademais, criticou as peaxes da autoestrada da Costa da Morte, especialmente entre Carballo e A Coruña, e sinalou que os descontos limitados da vía autonómica, fronte ás bonificacións doutras autoestradas estatais, sitúan aos veciños como “habitantes de segunda”.
