O presidente da Deputación da Coruña, Valentín González Formoso, e a alcaldesa de Camariñas, Sandra Insua, asinaron o convenio de colaboración para financiar as obras de reforma da envolvente exterior da antiga lonxa de Camariñas e da sala de exposicións Beti Donosti, edificio no que se ubicará o futuro Museo dos Naufraxios.
O investimento total ascende a 430.000 euros. A Deputación achega o 76,7 %, con 330.000 euros, mentres que o Concello asumirá o resto con fondos propios.
A actuación permitirá recuperar un edificio emblemático situado no peirao do Curbeiro, en estado de abandono desde hai décadas, e supón o primeiro paso para poñer en valor un espazo público vencellado á memoria mariñeira e aos naufraxios da Costa da Morte.
O proxecto inclúe a consolidación estrutural do inmoble, a reforma de cubertas e fachadas, a mellora da eficiencia enerxética e a renovación de carpinterías, mantendo o volume e o carácter industrial e mariñeiro do edificio.
Tras a sinatura, Valentín González Formoso destacou que o convenio exemplifica o compromiso da Deputación coa recuperación do patrimonio público e coa dinamización cultural da Costa da Morte. Pola súa banda, Sandra Insua subliñou que a actuación senta as bases para facer realidade o Museo dos Naufraxios e reforzar a oferta cultural e turística de Camariñas.
