O Parlamento de Galicia aprobou este xoves por unanimidade unha proposición non de lei (PNL) do Grupo Popular na que se solicita ao Goberno central a creación dunha base permanente do Servizo de Vixilancia Aduaneira (SVA) na ría de Camariñas (A Coruña). A medida ten como obxectivo reforzar os recursos destinados á loita contra o narcotráfico nesta zona da Costa da Morte.
A iniciativa inclúe tamén a modernización e ampliación dos medios materiais e tecnolóxicos do SVA, con atención á adquisición de embarcacións máis potentes e maniobrables, dotadas de tecnoloxía avanzada para a intercepción de narcolanchas. Ademais, proponse incrementar os recursos humanos e mellorar a distribución territorial destes en toda a costa galega, especialmente na provincia da Coruña.
Durante a defensa da proposta, a deputada do Partido Popular, Paula Mouzo Mas, sinalou que “a loita contra o narcotráfico é unha lacra que esixe unha postura firme de todos os que temos a misión e a responsabilidade de representar aos cidadáns”. Alertou de que o problema “segue presente e medrando nos últimos anos” e afirmou que “a droga pode descargarse nunha praia da ría de Camariñas, pero a súa influencia espállase por todo o territorio”.
A parlamentaria tamén subliñou a necesidade de mellorar as condicións laborais do persoal do SVA e criticou o que cualificou como “desidia” por parte do Goberno de Pedro Sánchez, mencionando casos nos que operativos foron cancelados por falta de cobertura horaria.
A proposta solicita garantir a operatividade plena do servizo e unha distribución equitativa dos recursos en todas as súas bases e comunidades.
